«Күннен туған баламын, Жарқыраймын, жанамын...» тақырыбындағы интеллектуальдық ойын
22 қыркүйекте ҚР Ұлттық академиялық кітапханасының мүмкіндігі шектеулі азаматтарға арналған залында «Бір ел – бір кітап» акциясы аясында халқымыздың көрнекті ақыны Мағжан Жұмабаевтың шығармашылығына арналған «Күннен туған баламын, Жарқыраймын, жанамын...» тақырыбында интеллектуальдық ойын өтті.
Ойынға қатысушылар зал оқырмандары - Қайырбекова Әлия, Певнев Евгений,Десяткова Татьяна. Келесі тарап – сайыс барысын қадағалап отырды, сөйтіп көрермен ретінде мәдени бағдарламаға белсенді қатысты. Десек бәрі де ретімен жалғасты...
ҚР Ұлттық академиялық кітапханасы бас директорының орынбасары Жанна Жантурина Мағжан жырларын оқып, ақын шығармашылығын жан-жақты зерделеу қажет деген тілекпен шараны ресми түрде ашты. Бұдан соң «Кім? Қайда? Қашан?» ойыны басталды. Бірінші кезең - ширату. Барлық ойыншыларға тапсырмалар берілді. Олар келесі тәрізді сұрақтарға жауап берді. Биылғы акцияға арнап шығарылған кітаптың атауы? («Сен сұлу», «Ол-жас» баспасы). 1905 жылы Мағжан келіп түскен Петропавл қаласындағы оқу орны? (Діни семинария). Ақынның алғашқы ұстазы, Шығыстың бірқатар тілдерін жетік меңгерген әрі арифметика мен география пәндерінен де дәріс берген башқұрт жігіті. Ол кім? (Ахиетден Аханов).
Ширату сәтінен соң тағы да үш тур өтті. Бұл кезекте қатысушылардың білім деңгейі байқалды. Олар ойынға жан-жақты дайындалыпты. Сондықтан тапсырмаларды қиындықсыз орындады. Ал сұрақтар күрделі болатын. Мәселен; М. Жұмабаев қай қозғалыстың жақтаушысы болды? (Алаш). М. Жұмабаев қандай әдеби-қолжазба журналды жарыққа шығарды? («Бірлік»). 1922 жылы Жұмабаевтың кітабы шықты, онда автор баланы бесіктен бастап тәрбиелеу қажеттігіне ерекше көңіл бөледі. Бұл кітаптың атау қалай? («Педагогика»). Мағжанның «Шолпан» деген атаумен ең алғашқы жыр жинағы қай қалада жарық көрді? (Қазан). Ақын М. Горькийдің қай шығармасын қазақ тіліне тәржімалады? («Песнь о буревестнике»). Я. Брюсовтың Мағжанмен теңестірген орыс халқының ұлы ақыны? (А. С. Пушкин). Жұмабаевты қамаудан босатуға көмек берген жазушы? (М. Горький).
Әрбір айналымның арасында ойынға қатысушылар мен қонақтар М. Жұмабаевтың жырларын оқып, өлеңдер айтты. Мәселен; Б. Кәрібаева - «Жизнь», «Мен жастарға сенемін», Е. Рахышева – «Қазақ тілі», С. Максимова - «Я живу на улице Магжана» өлеңдерін мәнерлей оқыды. О. Әбішева мен Е. Рахымша «Сен сұлу» әнін орындады. Ал әннің сөзін жазған М. Жұмабаев.
Интеллектуальдық ойын қорытындысы бойынша Әлия Қайырбекова, Евгений Певнев және Татьяна Десяткованың ұпайлары біркелкі болды. Оларға кітапхананың арнайы футболкалары сыйға берілді. Көрермендер тарапынан ойынға атсалысқандарға да тәтті тартулар таратылды.
Мәдени шара өте қызықты өтті. Жиналғандар ақынның өмірінен көптеген жаңа деректер білді, М. Жұмабаев жырларын бірінші рет тыңдағандар авторды тереңірек танып, оның өлеңдерін оқуға ниет танытты. Бұдан бөлек, мүмкіндігі шектеулі азаматтардың барлығы да бір-бірімен байланыс жасап, көтеріңкі көңіл-күйге бөленді.
Қайнар көзі: ҚРҰАК
