«Қазақ елі, бір ауыз сөзім саған…» тақырыбындағы поэтикалық марафон
23 қыркүйекте ҚР Ұлттық академиялық кітапханасның «Диалог» залында «Бір ел – бір кітап» акциясына арналған «Қазақ елі, бір ауыз сөзім саған…» атты поэтикалық марафон өтеді (М. Жұмабаев шығармашылығы бойынша).
Поэзия кешіне елордалық зиялы қауым, ҚР Республикалық Ұланға қарасты 0112 әскери бөлімнің әскери қызметкерлері, №3 мектеп гимназиясының, Ғ. Орманов атындағы №7 мектептің және Астана қаласындағы дарынды балаларға арналған Ақмола облыстық мамандандырылған №2 мектеп-интернатының, сондай-ақ №56, №62 мектеп-лицейдің оқушылары, Л. Н. Гумилев атындағы Еуразия Ұлттық университетінің және Астана қаласындағы Қаржы академиясының студенттері мен оқытушылары және басқа да танымал тұлғалар шақырылды. Елорда тұрғындары мен қала қонақтары радио мен газет басылымдарының мәлімдемесі арқылы, сондай-ақ Астана мекемелеріне таратылған плакаттардан біліп марафонға қатысты.
Марафонда ҚР Ұлттық академиялық кітапханасының бас директоры Рахымжан Отарбаев, ҚР Мәдениет және ақпарат министрлігі Мәдениет комитетінің аймақтық даму және кітапханалар басқармасының бастығы Серғазы Тәуекелов және жазушы Мұхтар Шаханов құттықтау сөз сөйледі. Бұдан соң жүргізуші Серік Тұрғынбеков М. Жұмабаевтың ағасы Аба Муслимнің немере қызы Сәуле Муслимоваға, М. Жұмабаевтың ағасы Қаһарманның немересі Мағжан Қаһармановқа сөз берді. Олар Мағжан Жұмабаевтың өміріндегі қызықты мәліметтермен таныстырып, жыл өткен сайын жібек жырлары жаңғыртып, ақын атағын шығарғандарға алғыс айтты.
«Бүгінде Мағжан Жұмабаевтың шығармашылық қызметі лайықты бағалануда. «Бір ел – бір кітап» акциясы еліміздің әр алуан аймағында өткізіліп жатқанына куәсы болып отырмыз». Осы ретте Қазақстан Республикасы Ұлттық академиялық кітапханасының ұжымына көп рахмет, - деген Сәуле Ғабдошқызы сөзін әрі қарай сабақтады. – Мағжанның құрметіне Солтүстік Қазақстан облысындағы бір ауданның аты Мағжан Жұмабаев деп аталды, Петропавл қаласында, Булаев ауданында және туған өлкесі Сарытомарда ескерткіш тұрғызылды, Мағжан мен жұбайы Злиханың бірге ғұмыр кешкен үйіне мемориальды тақта ілінді; Мағжанның тағдырын сипаттайтын спектакль, «Батыр Баян» пьесасы дүниеге келді. Петропавл қаласындағы бірқатар мекемелер - мектепке, колледжге, көшеге, саябаққа және Кітап үйіне Мағжан есімі берілген. Біз, ақынның бауырлары, осы ескерткіштерді орнатып, осындай іс-шараларды ұйымдастырушылардың барлығына да ризашылығымызды білдіреміз. К. Бақбергенов, Б. Қанапьянов, А.Жовтис, С. Пеньков, Н. Чернов және Л. Шашковтың тамаша тәржімасына, сондай-ақ Мағжанның қайталанбас лирикасы мен түрлі ұлт оқырмандары арасындағы достықтың дәнекері болған басқа да ақындарға алғысымыз шексіз.
Астанадағы марафон Мағжан жырларын жан-жақты зерделеуде ондаған, жүздеген жанның басын қосып, тағы да тартымды тармақтар туралы ой бөлістірді. Марафонда жазушы Д. Досжан Мағжан күнделігінен үзінді келтірсе, «Нива» журналының бас редакторы В. Гундарев аталған басылымның 1991 жылғы №1 санында жарияланған «Сүйемін» өлеңін оқыды. Астанадағы Үнді Мәдениеті орталығының директоры Пал Самар Кумар ақынның өлеңін хинди тілінде оқыды. Сондай-ақ бұл күні Мағжан поэзиясы орыс, қытай, ағылшын, итальян және француз тілдерінде сөйледі.
Марафон эстафетасын оқушылар, студенттер, журналистер, мемлекеттік мекеме өкілдері, әскери қызметкерлер біртіндеп қабыл алды. Олар: ҚР Парламент Мәжілісінің баспасөз хатшысы, ақын - Айбатыр Сейтақ, ҚР Ұлттық мұрағаты мұрағат қоймасының меңгерушісі – И. Бабаев; кітапхана оқырманы - Б. Кәрібаева; Үндістандық мейман - Пал Самар Кумар; журналист - Әнуар Омар; Ғ. Орманов атындағы №7 мектеп-лицейдің оқушылары – Ж. Есболған, З. Әбенов; Астана қаласындағы дарынды балаларға арналған Ақмола облыстық мамандандырылған №2 мектеп-интернатының оқушылары – Х. Жәкенов, А. Дүйсенова, Е. Қасықбаев, Ш. Мәжренова, С. Әміртаева; ҚР Республикалық Ұланға қарасты 0112 әскери бөлімнің әскери қызметкерлері – Е. Досхан; №3 мектеп гимназиясының оқушысы – С. Уәлиева; Л. Н. Гумилев атындағы Еуразия Ұлттық университетінің студенттері – П. Чунина, Д. Мұстафинова, А. Әлжанов және басқалар. Олар ақынның «Пайғамбар», «Қазақ тілі», «Мен кім», «Сағындым», «Мағжан ақын - кемеңгер», «Қазағым», «Махаббат не?», «Арнау», «Фетше», «Мен жастарға сенемін», «Жұлдызды – жүзік, Айды - алқа ғып берейін», «Жан сөзі» тәрізді өлеңдерін мәнерлеп оқыды. Марафонға қатысуға жүзден аса өтініш келіп түсті... Марафон соңында М. Жұмабаевтың «Сен сұлу» өлеңі орындалды.
Сонымен қатар марафон қатысушылары мен қонақтар М. Жұмабаевтың өмірі мен шығармашылығына арналған «Күннен туған кемеңгер» көрмесімен, кезінде Жұмабаев жақтасқан Алаш қайраткерлеріне арналған «Ұлттық рухтың күрескерлері» көрмесімен танысты. Бұдан бөлек, «Ұлттық поэзия падишасы» тақырыбында электронды тұсаукесер ұсынылды.
