1-қазанда Астанадағы Қазақстан Республикасының Ұлттық академиялық кітапханасында тұңғыш рет «Алтын жүрек» сыйлығының иегері, фотожурналист Самат Құсайыновтың «Сайын дала, салт-дәстүр сыр шертеді суретте» тақырыбымен жеке фотокөрмесі ашылды.
Көрмеде жүзден аса фотография қойылған. Бұл - автордың ең үздік туындылары. Мұның барлығы да ұлттық дәстүрімізге, мәдениетімізге және кең-байтақ табиғатымызға арналған. Автор «шаңырақ», «киіз үй», «алтыбақан», сондай-ақ «бәйге», «қыз қуу», «көкпар» тәрізді ұлттық жарыстарды, «кеш бату», «таң ату», «көл», «қызғалдақтар», орман тәрізді әсем құбылыстарды фотоөнер тілімен көрсете алды.
Самат Құсайынов «Алтын жүрек» сыйлығының иегері болып саналады, оған «Сарысудың сырлы суреті» атты фотокөрмесі үшін еліміздің Президенті алғыс хат табыс етті. 2008 жылы автор жұмыстарынан тұратын фотоальбом жарық көрді, ал биыл «Алматы – жан жүрегім» атты фотокөрмеге қатысып, екі бірдей номинацияның лауреаты атанды.
Көрмені ұйымдастырушылар – ҚР Ұлттық академиялық кітапханасы мен Мемлекеттік тілді дамыту жөніндегі Президенттік қор.
