2 қазанда ҚР Ұлттық академиялық кітапханасында Халықаралық Бейбітшілік пен зорлықтан арылу күні аталып өтті (Ганди Джаянти). Іс-шара Қазақстан Республикасындағы Үндістан Елшілігімен бірлесіп ұйымдастырылды.
Қазақстандағы Үндістанның Төтенше және Өкілетті елшісі Ашок Саджанхар мырза, ҚР Ұлттық академиялық кітапханасы бас директорының орынбасары Әлия Сәрсембинова, Халықаралық діндер мен мәдениет орталығының директоры Айдар Әбуов мырза шақырылған 150 қонақты құттықтау сөз сөйледі. Мәртебелі меймандар қатарында мемлекеттік қызметкерлер, ғылыми қайраткерлер, мәдени мекеме өкілдері, университет оқытушылары, студенттер, әртістер, сондай-ақ Астанада тұратын Үндістан азаматтары да бар.
Салтанатты рәсімдегі сөзінде Елші А. Саджанхар мырза жиналғандарға биыл Халықаралық Бейбітшілік пен зорлықтан арылу күні ретінде Махатмы Гандидің туғанына 140 жыл толуын атап өтіліп жатқандығын мәлім етті. Әлем Апостолі Махатма Ганди 1869 жылғы 2-қазанда туған. Үндістанда бұл күн «Ганди Джаянти» ұлттық мерекесі жыл сайын тойланады. Біріккен Ұлттар Ұйымы 2-қазан Махатма Гандидің туған күнін «Халықаралық Бейбітшілік пен зорлықтан арылу күні» деп белгілеуге шешім шығарды. Елші мырзаның айтуынша, Махатма Гандиге арнап бүкіл әлем бойынша көптеген іс-шаралар өткізілуде.
«Махатма Гандидің күш-құдіреті дене күшінде емес. Ол әскери қолбасшы да болған жоқ. Ол елімізде ешқандай да ресми лауазымды орында болмады. Дегенмен, өзінің сөздері, идеялары, таным-түсінігі, білімі арқылы ғана күллі ұлтты, тұтас халықты ұйымдастыра алды. Бұл Интернет пен мобильді байланыстың пайда болуына дейінгі жағдай. Мұның бәрін ол оқытушылық өмірінің арқасында жүзеге асырды. Бірде өзі былай деген: «Менің өмірім – бұл менің жолдауым», - деп дәлел келтірді Ашок Саджанхар мырза.
Елші осы салтанатты пайдаланып, ҚР Ұлттық академиялық кітапханасына кітап, фильм және музыка коллекцияларын тарту етті. Ол Махатма Ганди атындағы Үнзі зерделеу орталығына кітапханадан бөлме бергені үшін Ұлттық академиялық кітапхана ұжымына алғыс білдірді.
Халықаралық Бейбітшілік пен зорлықтан арылу күні мерекесіне мәдени бағдарламалар да кірістірілген. Гауһар Мұхтардың орындауындағы Махатма Ганди әнұранын жиналғандар жылы қабылдады. Гауһар Мұхтар - үнді еліне арнайы барып хинди тілін үйренген қазақстандық азаматша. Ал Нью Делиде Үнді классикалық биін шебер меңгерген Нұргүл Әмірбекова ханым Одиссидің классикалық би ағымына тән екі бірдей тамаша биі арқылы елді елеңдетті. Махатма Ганди атындағы Үнді зерделеу орталығының оқырмандары да хинди тілінде өлеңдер оқып қонақтарға ерекше көңіл-күй сыйлады.
