7 қазанда ҚР Ұлттық академиялық кітапханасында Мұрын жырау Сеңгірбекұлының 150-жылдығына арналған «Жыраулық дәстүр жауһарлары» атты республикалық ғылыми-практикалық конференция өтті. Шара Қазақстан халқы тілдерінің ХІ фестивалі аясында Қазақстан Республикасы Мәдениет және ақпарат министрлігінің Тіл комитеті мен М. Әуезов атындағы Әдебиет және өнер институты тарапынан ұйымдастырылды.
Мұрын жырау Сеңгірбекұлының есімі елге елеулі. Ол 1859 жылы Маңғыстау түбегінде дүниеге келген. Жасынан ұсталық, зергерлік өнерге деген қабілетімен көзге түседі. Асқан дарындылығының арқасында темірмен де тілқатысып ХХ ғасырдың 30-жылдары Форт Шевченко қаласында ұста шеберханасын құрады. Ауыр жұмыстан соң адам жаны тынығуы тиіс. Осы ретте тумысынан өнерге деген талапты жас асыл сөз өнеріне ертерек үйір болып, өлеңге, әнге, күйге құмарта өседі. Талапты жастың көкірегіне сөз өнеріне деген құмарлықты дарытқан алғашқы тәрбиеші анасы Қалдыкөз болады. Сөйтіп жыршылыққа әбден аңсары ауады. Ақын жыршы, жыраулардың байырғы салт-дәстүрі бойынша ел аралап, жыр айтып жүрген атақты ақын, жыршылардың жанына еріп, олардан өлең, жыр үйренеді.
Мұрын жырау Сеңгірбекұлы – «Қырымның қырық батыры» эпосының авторы. Бұл - XIV-XVII ғасырда Қырым түбегінен Алтай тауларына дейінгі аймақты мекендеген халықтар туралы тарихи-поэтикалық шежіре. Бірақ бұл еңбек аңыз түрінде жазылған, әрбір сюжеттің желісінде бірнеше ғасыр бұрын Қырым, Маңғышлақ, Тұран, Қазақстан және Орталық Азия жазирасында орын алған тарихи оқиғалар жатыр. Ауқымдылығы жағынан бұл шығармада көптеген халықтардың тарихы қамтылған. Мәселен; қазақ, ноғай, түркмен, қырғыз және басқалар. Сондықтан Мұрын жырауды Қазақстан, Азия және Ресей секілді халықтардың ғалымдары зерттеуге мүдделі.
Жуықта жырау шығармашылығы мен Маңғыстау тарихына арналған «Мұрын жырау. Форт-Шевченко» кітабы жарық көрді. Жаңа туынды конференция қатысушыларына сыйлық ретінде үлестірілді.
Конференцияда ҚР Мәдениет және ақпарат министрлігі Тіл комитетінің төрағасы Е. Шаймерден, Маңғыстау облысы әкімінің орынбасары Ж. Қараев, Маңғыстау облысы әкімінің кеңесшісі, ҚР Еңбек сіңірген қайраткері, тарих ғылымдарының докторы Ө. Озғанбаев, жазушылар - Серік Негимов, Әнес Сарай, Әкім Тарази, Төлен Әбдік, әл Фараби атындағы Қазақ Ұлттық университетінің профессоры Ж. Тілепов және еліміздегі зиялы қауым өкілдері баяндама жасап, құнды мәліметтер келтірді. Конференцияның екінші бөлімінде Мұрын жырау Сеңгірбекұлының біздің дәуірімізге жеткізген қымбатты қазынасы «Қырымның қырық батыры» жырынан Б. Әлімжанов, Ж. Жәмеков, Т. Бисенбаев, А. Көмеков тәрізді жыршылар үзінділер орындады.
