Оқырмандарға жаңа әрі сапалы ақпараттар ұсынылуы қажет. Бұл міндетті ҚР Ұлттық академиялық кітапханасының ұжымы әрдайым ескеріп отырады. 7 қыркүйекте осы кітапхана ұжымының бастамасымен әлемге әйгілі «Шпрингер» компаниясы ҚР Ұлттық академиялық кітапханасының мамандарына, сондай-ақ елордалық кітапханашыларға арнап ақпараттық семинар-тұсаукесерін өткізді. Семинарды «Шпрингер» компаниясының менеджері - Ситки Актас жүргізді, автордың баяндамасын ағылшын тілінен аударған ҚР Ұлттық академиялық кітапханасының мамандары - Т. Ермекпаева және Н. Ағзамова.
«Шпрингер» - дүниежүзілік жетекші компаниялардың бірі, оның негізгі өнімдеріне журналдар, кітап сериялары, кітаптар, анықтама материалдары, мұрағат жинақтары және мәліметтер базасы жатады. Бұлар зерттеушілерге, ғалымдарға және медицинаға, ғылым мен техникаға қызығатындардың барлығына арналған. Авторлардың жариялауға ұсынған мақалаларын алдымен ғалымдар тексереді, содан соң сараптамадан өтеді. Сөйтіп 100% ақпараттың 20% пайызы ғана жайғастырылады. Қалған 80%-ы – қабылданбаған материал, бұлар талапқа сай келмейді.
Тұсаукесерде дәріскер мәліметтер базасының мамұнымен таныстырып, ақпарат іздестіруді қалай жүргізу қажеттігін баяндады.
2010 жылғы 1 ақпаннан бастап астаналық кітапханалардың оқырмандары келесі сайт арқылы «Шпрингер» компаниясының барлық материалдарына ақысыз қолжеткізуге мүмкіндік алады www.springerlink.com.
Астанадағы семинар-тұсаукесер – қазақстандықтардың «Шпрингер» компаниясымен тұңғыш кездесуі. Басқосу ҚР Ұлттық академиялық кітапханасында өтті. Бұл кездейсоқтық емес. Ситки Актас мырзаның пікірінше, «Қазақстан - қарқынды дамып келе жатқан ел, мұнда білім беру мәселесіне ерекше көңіл бөлінеді. Бүгінгі ақпараттық қоғамда кітапхананың ролі де өзгерді. Кітапханашылар оқырмандарға жақыннан да, алыстан да қызмет көрсетуде. Бұл - өте маңызды. Бүгінде ақпаратты бақылаусыз таратуға болмайды, мәліметті басқару қажет, сондықтан біз бұларды кітапханашылар қолына табыстауға тиіспіз. Солар ғана ақпаратты реттеп, қажеттісін көрсете алады».
Әлемге әйгілі «Шпрингер» компаниясы мәліметтер базасының семинар-тұсаукесеріне елордалық 40 кітапханашы қатысты. Демек, көп ұзамай елордалық оқырмандарға техника, ғылым және медицина салалары бойынша жаңа және толықмәтінді мәліметтер ұсынылатын болады.
