Сіздерді келіп жеткен кітапханашылар күнімен құттықтаймыз!
Бүгінгі кітапхана - әлеуметтік институт ретінде заманауи ақпараттық қоғамды қалыптастыруға белсенді қатысатын мекеме. Осыған орай, әлемдік ақпараттық кеңістікке кітапханаларды белсенді ықпалдастыру және оқырмандарға қызмет көрсету мәдениетін арттыру міндеті осы сала мамандарына жүктеледі.
Осынау азабы мен ғажабы қат-қабат кітапханашы еңбегі еленді ме, 1999 жылы Алматы қалалық әкімшілігі 15-қазанды кітапханашылар күні ретінде белгілеу туралы шешім шығарды. Мұны мамандар үлкен тарту деп қабылдады. Міне, содан бастап алматылық кітапханашылармен қатар еліміздің өңірлеріндегі әріптестеріміз жыл сайын осы төл мерекені ресми болмаса да асыға күтеді. Өз жетістіктерімен бөлісіп, бір-біріне әріптестік ақ тілектер арнап, құттықтаулар жолдауды дәстүрге айналдырды. Одан бөлек, қазақстандық қоғам өміріне кітапханашылар да өз үнін жеткізуге мүмкіндік алды. Осылайша, еліміздің мәдени-ағарту ісін ілгерілетудегі кітапханашы қауымының қосып жатқан үлесі айқын көріне бастады.
Мұндай кәсіби мереке Ресейде 28-мамырға белгіленсе, күнгейдегі көршілер - Өзбекстан, Қырғызстан, Тәжікстан тәрізді елдерде де аталып өтіледі.
Біз, кітапханашылар қауымы шет мемлекеттер шекараларының жабықтығына қарамастан, әлемдік әріптестерімізбен берік байланыстамыз. Жыл сайын ИФЛА ұйымының ұйғарымы бойынша дүниежүзі елдерінің кітапханашылары бас қосып, өз еліміздің кітапханаларындағы игі істеріміз, озық идеяларымыз жөнінде пікір тарқатамыз, тәжірибе алмасамыз.
Сөз зергері Әбіш Кекілбаевтің «Кітап – Кітапхана – мәңгілік парасаттың ең киелі ғимараты» дейтін бейнелі тіркесі бар. Демек, кітапханашы кәсібі талайлардың тағдырына мәңгілік шуақ түсіріп, сәулелі жол нұсқайтын парасат құбыланамасы іспетті.
Сіздердің шығармашылық еңбектеріңізге шалқар шабыт тілейміз. Бұдан әрі де кітапханалық шеберлік шыңынан көріне беріңіздер!
Жұмыстарыңыз жемісті болсын!
