15 қазанда ҚР Ұлттық академиялық кітапханасының этнографиялық залында белгілі жазушы Бердібек Соқпақбаевтың туғанына 85-жыл толуына орай «Балалық шаққа саяхат» тақырыбында әдеби кеш өтті. Б. Соқпақбаев - «Өлгендер қайтып келмейді» романының, «Менің атым Қожа», «Балалық шаққа саяхат», «Чемпион», «Мен қайта ораламын» секілді повестердің, «Қайдасың, Гауһар?», «Аяжан» тағы да басқа әңгімелердің авторы. Бұл шығармаларды кез келген оқырман сүйіп оқиды.
Бердібек Соқпақбаев кітаптарының кейіпкерлерімен кездесу кешіне белгілі жазушы Әкім Тарази, Л. Н. Гумилев атындағы ЕҰУ-нің студенттері, «Қаржы академиясы» АҚ-на қарасты колледждің және С. Мәуленов атындағы № 37 мектеп-гимназиясының оқушылары қатысты.
ҚР Ұлттық академиялық кітапханасы ғалым-хатшысы Ғ. Исақанова Бердібек Соқпақбаевтың қызы – Самал Бердібекқызынан жеткен хабарламамен таныстырды: «Қазақстан Республикасы Ұлттық академиялық кітапханасының ұжымына алғысым шексіз. Сіздің кітапханаңыз менің әкем – белгілі балалар жазушысы Бердібек Соқпақбаевтың әдеби кешін өткізіп жатқандардың бірі болып саналады. Менің әкем әр алуан шығармалары арқылы халқын танытты. «Менің атым Қожа» фильмі балалар фильмі ретінде бас жүлдеге ие болған. Жастарға айтарым, барынша көп оқыңдар, өйткені кітапсыз өмір мәнсіз. Жастар өз жазушысын білуі тиіс», - деп келтірілген хабарламада.
Әдеби кеште Б. Соқпақбаевтың өмірі мен шығармашылығы жайлы электронды тұсаукесер өткізіліп, студенттер мен оқушылар «Өлгендер қайтып келмейді», «Дала жұлдызы», «Қайдасың, Гауһар?», «Жекпе-жек» шығармаларынан монолог оқыды, қобыздың сүйемелдеуімен орындалған халық әні «Екі жиренді» жиналғандар жылы қабыл алды, сондай-ақ «Менің атым Қожа» фильмінен үзінді көрсетілді. Бұдан бөлек, қонақтар «Балалар әдебиетінің бәйтерегі» атты кітап көрмесі арқылы жазушының шығармашылығымен, оның туындыларымен танысты.
Бердібек Соқпақбаев 1924 жылы 15 қазанда Алматы облысы Нарынқол ауданының Қостөбе ауылында туған. Ол 8 жасында анасынан айрылды. Жас бала тағдырдың талай сынынан өтіп, қиындықтарға шыдай білді: ауыр еңбекке де, аштыққа да, «жалданып» жұмыс жасауға да.
Бердібек Соқпақбаевтың кітаптарының басым бөлігі өмірбаяндық. «Балалық шақта бастан өткізгендерің ешқашан ұмытылмайды. Әсері де зор, ыстығы да басылмайды. Күлдің астыңғы қабатының қызуы тәрізді жылылық бар. Бұл қабат отты лаулата түсіруі тиіс!», - дейді автор.
Өкінішке орай, қаламгердің өзі өмірден озып кетті, бірақ көптеген кітаптар қалдырды, бірқатар оқырмандарымыздың алдында автор кейіпкерлерімен кездесетін бақытты сәттер де тұр.
