2010 жылдың 15 қаңтарында ҚР ҰАК-да «Ерейментау» кітабының тұсаукесері болып өтті. Оған ақын-жазушылар, мәдениет және өнер қайраткерлері, тарихшылар, көптеген зиялы қауым өкілдері қатысты. Шара барысында «Фолиант» баспасы кітаптарының көрмесі бірге ұйымдастырылды.
Аталмыш серия аясында бұған дейін де бірқатар кітаптар оқырманға жол тартқан болатын. Соның жалғасы ретінде жуырда «Ерейментау» кітабы (авторы С.Байбосын) жарық көрді. Кең-байтақ қазақ даласының қасиетті бір пұшпағы саналатын осынау өңірдің арғы-бергі тарихы хатталған, ел аузында айтылатын аңыз-әңгімелер салыстырыла сараланған, неғұрлым айтулы оқиғалар мен шежірелік жылнамалар жүйеленген, тарихи танымал тұлғалар туралы сыр шертетін, осы өңірдің ғана емес, жалпы ел тарихының бір кетігіне кірпіш болып қаланған көркем де келісті кітаптың оқырманға берері аз емес. Мұндағы деректер тек тарихшыларға немесе өлкетанушыларға ғана емес, туған өлке тарихына қызығатын жалпы көпшілік қауымға да пайдалы болары сөзсіз.
Баспа ісі саласында 1996 жылдан бері жемісті еңбек етіп келе жатқан «Фолиант» баспасы – бүгінде кез келген полиграфиялық тапсырысты жоғары талапқа сай орындап шығуға мүмкіндігі бар бірегей баспа. Әр түрлі оқулықтар, сөздіктер, көркем шығармалар, т.б. басып шығаруда бай тәжірибесі, білікті мамандары бар баспа соңғы 3-4 жыл мұғдарында «Менің Отаным – Қазақстан» атты сериямен кітаптар шығаруды қолға алған болатын. Өлкетану тақырыбындағы бұл тарихи-танымдық, көркемсуретті еңбектерді жариялаудағы басты мақсат – еліміздегі шежіреге толы өңірлер мен қойнауы тарихқа бай аймақ-аудандарымызды қалың жұртшылыққа кеңінен таныстыру, тәуелсіз Қазақстан азаматтарының, оның ішінде өскелең жас ұрпақтың бойына отаншылдық сезімін ұялату.
