2010 жылдың 26 қаңтарында ҚР Ұлттық академиялық кітапханада Қазақстан халқы Ассамблеясы және Ресей Федерациясы Татарстан халықтар Ассамблеясы арасында әріптестік туралы келісімге қол қойылды.
Аталған Келісім туралы құжатқа Қазақстан халқы Ассамблеясы атынан ҚХА Төрағасының орынбасары –Хатшылық меңгерушісі Ералы Лұқпанұлы Тоғжанов, Ресей Федерациясы Татарстан халықтар Ассамблеясы тарапынан Ресей Федерациясы Татарстан Республикасы Парламентінің спикері, ТХА Кеңесінің төрағасы Фарид Хайруллович Мұхамедшин қол қойды.
Шараға Ассамблея атынан ҚР Парламенті Мәжілісіне сайланған депутаттар, Қазақстандағы татар және татар-башқұрт этномәдени бірлестік басшылары, бұқаралық ақпарат құралдары қатысты. Этносаралық төзімділіктің қазақстандық үлгісі тәжірибесімен таныстыруға арналған отырысқа РФ Татарстан халықтар Ассамблеясы Кеңесі төрағасының орынбасары, «Біздің үй-Татарстан» журналының жауапты хатшысы Сағит Көдебайұлы Жақсыбаев қатысты.
Келісім негізінде мәдениетаралық қарым-қатынас, білім беру және ғылыми бағыттардағы өзара іс-қимыл, мемлекеттік ұлттық саясатты жүзеге асыру бойынша тәжірибе алмастыру, этносаралық келісім және төзімділікті нығайту салаларында әріптестік орнату жоспарланған.
Кездесу барысында Келісімді әрі қарай жүзеге асыру мәселелері қарастырылып, бірлескен іс-қимыл бағыттарын нақтылайтын қосымша шаралар әзірлеу туралы келісілді. Сонымен қатар, екіжақты мәдени-гуманитарлық әріптестіктің өзекті мәселелері бойынша сындарлы пікір алмасу өтті.
Шара нәтижесінде қатысушылар бірлескен Келісімге қол қою этносаралық және конфессиаралық келісімді қамтамасыз ету, жалпыадамзаттық құндылықтар мен мәдениетаралық диалогты нығайтуда мемлекеттер арасындағы ынтымақтастық пен әріптестік қатынастарды дамытуға елеулі үлес қосатынын атап өтті.
