Осы жылдың 18 наурызында ҚР Ұлттық академиялық кітапханасының этнография залында Наурыз мейрамына арналған мерекелік шара өтті. Оны ұйымдастырушылар – ҚР ҚР Ұлттық академиялық кітапханасы және Астана қ. С.Мәуленов атыдағы №37 орта мектеп. Сынып жетекшісі Г.А.Оспанованың жетекшілігімен 8-ші сынып оқушылары «Ұлыстың ұлы күні» атты музыкалы-поэтикалық композиция көрсетті. Сценарий бойынша «Толе би», «Қазыбек би» және «Әйтеке би» үш ауылы өлең және поэтикалық сайысқа түсіп, «қыз ұзату», «беташар», «тұсау кесер» салт-дәстүрін көрсетті, оның арты күмбүрлеген домбыра үніне жалғасып, қыз-жігіттер ұлттық би өнеріне барша жұртты қанық етті, ал ең мықтылар «қол күрес» пен «арқан» тартуда күш сынасты. Қонақтар мен мерекеге қатысушылар «Армысың әз, Наурыз» кітап көрмесімен танысты.
Мерекеге қатысушылар ұлтымызға тән қасиет бір-біріне ізгі тілек тілеп, «ақ мол болсын, еліміз тыныш болсын» деп бата беріп тарқасты.
