Осы жылдың 15 мен 30 наурызы аралығында ҚР ҰАК бір топ мамандары Египеттегі Қазақстан Республикасының Елшілігі мен ТМД елдерімен техникалық ынтымақтастықтың Египеттік қоры ұйымдастырған сынақтан өтті. Қазақстандық кітапханашылар Египеттің жетекші кітапханаларының базасы негізінде оқуларын жалғастырды.
Египеттің ұлттық зерттеу орталығы ұйымдастырған арнайы семинарда «Ақпараттық технологияны қағазды және сандық жүйе кітапханаларына енгізу», «Құжаттар мен қолжазбаларды қалпына келтіру және оларды сандық жүйеге айналдыру», «Кітапхана қызметінде Интернет желісін пайдалану технологиясы және оларды дамыту», «Дистанциялық оқыту», «Кітапханашыны кәсіби және психологиялық дайындықтан өткізу» дәрістері оқылды. Сабақтың теориялық бөлігі практикалық жаттығулармен жалғасты. Мысалы, Ұлттық кітапхананың бірегей лабороториялары мен Египеттің мұрағатында құжаттарды қалпына келтірудің басынан аяғына дейінгі барысы көрсетілді. Каир университетінің, Американдық университеттің, Александрия кітапханаларына барған кезде көптеген және қызықты ақпараттарды алдық, бір-бірімізбен тәжірибе алмастық.
Сынақ кезінде мәдени бағдарламаларға да ерекше көңіл бөлінді. Біздің кітапханашылар Египет мұражайына, Бейбарыс сұлтанның мешітіне, әлемнің жеті ғажабының бірі - Египет пирамидасына барып, Шарм эль Шейх курортын көрдік.
Алдағы уақытта ҚР Ұлттық академиялық кітапхана мен Александрия және Египеттің Ұлттық кітапханалары арасында ынтымақтастық туралы Келісімге қол қою көзделуде.
Египет кітапханаларымен кітапханалық және оқу-әдістемелік ынтымақтастық жасау - олардың мамандарды даярлаудағы озық тәжірибесін қабылдауға, шетелдік әріптестермен бірлесе отырып, кітапхана үрдістерін автоматтандыру жөніндегі маңызды міндеттері шешуге, көрмелерді ұйымдастыруға, қазақстандық және египеттік кітапханалардағы журналдарда жарияланатын материалдармен алмасуға мүмкіндік береді.
