Осы жылдың 20 сәуірінде ҚР Ұлттық академиялық кітапханасында «Фолиант» баспасы «Менің Отаным – Қазақстан» атты сериямен шыққан жаңа «Қазығұрт» кітабының тұсаукесерін өткізді Тұсаукесерге белгілі мәдениет қайраткерлері, зиялы қауым өкілдері, ақындар мен жазушылар қатысты.
Бұл кітаптың авторы белгілі қоғам қайраткері, әрі жазушы және публицист Қ.Тұрсынқұлов. Еңбекте Қазығұрт өңірінің арғы-бергі тарихы жүйелі жазылған. Қазығұрт тауына қатысты Нұқ пағамбардың кемесі жайлы аңыздың мәлім де беймәлім сырлары әсерлі баяндалған. Сонау ықылым заманда осы өлкені жанкештілікпен талмай кезген Қытай жиҺангездерінің, сондай-ақ, кейінгі саяхатшылардың жазбаларындағы деректер нанымдылығымен, нақтылығымен құнды. Түрік қағанатының билеушісі Истеми,Шыңғыс хан мен Ақсақ Темір, Александр Македонский мен тұмар ханым,Абылай мен Төле би, басқа да айтулы тарихи тұлғалар Қазығұрт бойындағы оқиғалармен ұштастырыла суреттелген. Сонымен бірге, ауданның таңғажайып табиғаты, жан-жануарлар әлемі, өсімдіктер дүниесі және әлеуметтік-экономикалық, мәдени-рухани келбеті жайлы да нақты деректер бар. Мұндағы мәліметтер тек тарихшыларға немесе өлкетанушыларға ғана емес, туған өлке тарихына қызығатын жалпы көпшілік қауымға да пайдалы болары сөзсіз.
Бір сөзбен айтқанда, «Қазығұрт» кітабы және осы серия бойынша шыққан - «Ұлытау», «Ойыл», «Ерейментау», «Отырар», «Баянауыл» кітаптар – туған өлке тарихын терең тани түсуге жәрдемші болар бағалы еңбектер.
