Сәуірдің 22-сінде сағат 10-30-да АҚШ-тың Қазақстандағы Уақытша сенімді өкілі Памела Л. Спратлен ханым Астанадағы Қазақстан Республикасының Ұлттық академиялық кітапханасында «Америка бұрышын» ашу салтанатына қатысты. Бұл «Америка бұрышы» АҚШ туралы ең жаңа және сенімді ақпаратпен қамтамасыз етіп қана қоймай, түрлі кездесулер мен өзге де басқосулар өткізетін орынға айналмақ. Тұсаукесер рәсіміне Уақытша сенімді өкіл Спратлен ханыммен қоса Мәдениет министрлігі Мәдениет комитетінің төрағасы Ілияс Қозыбаев, Астана қаласы әкімдігінің өкілі және Ұлттық академиялық кітапхана директоры Рақымжан Отарбаев қатысты.
Қазақстанның түкпір-түкпіріндегі «Америка бұрыштары» тәрізді Астанадағы «Америка бұрышы» да АҚШ Елшілігі мен Ұлттық академиялық кітапхананың бірлескен мекемесі. Кітапхана «Америка бұрышына» арнап бір бөлмесін бөлді, сондай-ақ АҚШ мәдениетіне қызығушылық білдіріп келгендерге бағыт сілтеп отыратын ағылшын тілінде сөйлейтін бір қызметкерін үйлестіруші етіп тағайындады. Ал АҚШ Елшілігі өз тарапында Американың мәдениеті мен тарихына қызығушылық танытқандарға қажетті сілтеме материалдар, көркем және деректі әдебиет, CD дискілер және бейнематериалдармен қамтамасыз етеді. «Америка бұрышы» аптасына 6 күн, сағат 10-нан 20-ға дейін келушілерді қабылдайды. Ондағы мультимедиалық материалдармен, кітаптармен және мерзімді баспасөзбен танысуға кез келген адамның мүмкіндігі бар.
Елшіліктің «Америка бұрышы» бағдарламасы Қазақстанның түкпір-түкпіріндегі қауымға ақпарат беріп, оларды өз қатарына тартуды мақсат тұтады. Елішілік пен кітапхана қызметкерлері бірлесе отырып бұл мекемеде Американы тануға мұрындық болатын түрлі бағдарламалар ұйымдастырады. Мәселен, мұнда АҚШ-тан келген түрлі баяндамашылармен пікірталастар, америкалық музыканттардың мастер-кластары, Америка фильмдерінің көрсетілімдері, және америкалық сурет және фотоөнер туындыларының көрмелері өткізіліп тұрады.
АҚШ Елшілігі «Америка бұрышының» шымылдығын «Джем сешн: Джаз елшілері әлемді құшағына қысады» деген тақырып аясында фотокөрмемен ашты. Көрмеде Луи Армстронг, Дэйв Брубек, Диззи Гилеспи, Бенни Гудмен, Дюк Эллингтон және басқа да «Джаз елшілері» бағдарламасы қарлығаштарының 55 суреті қойылады. Суреттер «Джаз елшілерінің» өмір-тарихын әдемі суреттеп қана қоймай, олардың сапарларындағы түрлі жайттардан да мағлұмат береді.
«Америка бұрышы» бағдарламасы немесе Астанадағы ашылу рәсіміне қатысты қосымша ақпарат алғылары келсе, АҚШ Елшілігінің қоғаммен байланыс бөліміне (7172) 70 22 16, 70 24 15 хабарласуыңызды сұраймыз.
