Қазақтың қыран қызы
Үстіміздегі жылдың 6 мамырында сағат 16.00 де ҚР Ұлттық академиялық кітапханасының этнозалында алғашқы қазақ ұшқыш қызы Хиуаз Доспановаға арналған «Қыран қызы қазақтың» атты кеш өтті.
Хиуаз Доспанова Москваның бірінші медицина институтында екінші курста оқып жүріп, майданға өз еркімен аттанды.Әскери ұшқыш ретінде 300-ден аса әуеге көтеріліп, жаумен шайқаста ерлік пен ержүректік танытты.
Кеңес Одағының батыры, эскадрилия командирі Марина Чечнева өзінің «Менің әскери құрбыларым» деген кітабының 15 бетін Хиуаз Доспановаға арнаған. Кітабында Чечнева былай дейді: «Доспанова әрдайым өз ұшағын бағдарға айна қатесіз бағыттайтын және сол әдіспен өз аэродромын таба алатын шебер ұшқыш болатын». Әйелдер авиаполкына «гвардиялық» деген, содан соң «Тамань» деген атақ берілді. Полктың туына «Қызыл жұлдыз» және Суворов ордендері ілінді.
Әскердегі ерлігі үшін Х.Доспанова Қызыл жұлдыз, II дәрежелі Отан соғысы ордендерімен, медальдермен марапатталды. Оның әскери шені – аға лейтенант. Еліміз Хиуаз Доспанованың ерлігі туралы әскери тілші С.Сейітованың майдан газеттерінде жарияланған мақалаларынан білді.
Бұл келтірілген деректер Хиуаз Доспанованың майдандағы ерлігінің қысқа ғана көрінісі. Батыр апамыздың ерлігі туралы «Қыран қызы қазақтың» кітап көрмесінен толық білесіздер. Онда Хиуаз Доспановаға арналған кітаптар, құжаттар, фотосуреттер, газеттер мен журналдардағы жарияланымдар қойылған.
Кешті кіріспе сөзбен ҚР ҰАК ғылым хатшысы Ғ.Б.Исақанова ашты. Одан кейін сөз алған халық ақыны Фариза Оңғарсынова батыр ұщқыш апамыздың ержүректігі мен Отанға деген сүйіспеншілігін атап өтті. Хиуаз Доспановаға арналған поэманың авторы ақын Маржан Ершу апамызға арналған өз туындысын ұсынды. . Поэмадан үзіндіні «Нұр Отан» ХДП Астана қалалық жастар мәслихатының мүшелері оқыды. Хиуаз Доспанова апамыздың ерлігі мен өміріне байланысты арналған слайд шолу көрсетілді.
