Осы жылдың 6 және 11 маусымында ҚР Ұлттық академиялық кітапханасында Ұлы Отан соғысындағы жеңістің 65 жылдығына арналған «Естен кетпес сол күндер» атты кездесу болып өтті. Оған Отан соғысының ардагерлері, соғыстан кейінгі жылдары Ақмола темір жол торабының темір жол транспортында жемісті еңбек еткен Қаматай Темірбекұлы Тоқабаев, Владимир Ильич Духновский, Сейтжан Есілов қатысты.
6 маусымда өткен кездесуге Республикалық гвардияда әскери борышын өтеп жүрген (0112 әскери бөлім) солдаттар шақырылды. Ардагерлер оларға соғыс кезіндеге совет жауынгерлерінің ерліктерін әңгімеледі, одан әрі кездесуді кітапхана оқырманы, Қазақ Ұлттық академиясының түлегі Бибігүл Байгалиева әнмен жалғастырды. Кездесуге қатысушылар содан кейін «316 атқыштар ротасы» деген деректі фильмді тамашалады.
11 маусымдағы ардагерлермен кездесуге ҚР ҰАК мамандары, оқырмандар, Тынышпаев атындағы транспорт және коммуникация академиясы жанындағы Ақмола колледжінің оқушылар келді.
Осы шараға орай соғыс ардагерлері Қ.Т.Тоқабаевқа, В.И.Духновскийге, С.Есиловқа арнап құжаттар мен фотосуреттер ілінген стенд безендірілді. Сонымен бірге ардагерлердің ерлік істерін көрсететін слайд-шоу дайындалды.
