Сөз өнеріне ғашық қаламгер
Үстіміздегі жылдың 17 маусымында ҚР Ұлттық академиялық кітапханасының «Көгілдір залында» поэзияның дария толқынында батыл жүзе білген, өлең-жырларында өзіндік қолтаңба қалдыра білген ұлтжанды азамат Айыпберген (Айып Нұр) Балтабайұлының мерейтойына орай «Сөз өнеріне ғашық қаламгер» әдеби-шығармашылық кеші өтті.
Кешке Қазақстан Республикасы Парламент Мәжілісінің депутаттары Шалатай Мырзахметов, Төлебек Қосмамбетов, филология ғылымының докторы, профессор Серік Негімов, ҚР ҰАК бас директорының орынбасары Жұматай Бердібайұлы Үсенбаев, Астананың позия сүйер қалың қауымы, оқырмандар мен ақынның өлең-жырларын пір тұтан азаматтар қатысты.
Кешті құттықтау сөзбен ашқан ҚР ҰАК бас директорының орынбасары Ж.Б.Үсенбаев А.Балтабайұлының шығармашылығы Оңтүстік Қазақстан өңірінде кеңінен танымал екенін, оның өлеңдеріне музыка жазушы әуесқой композиторлар ақынның творчествосын облыс көлемінен асырып жібергенін атап өтті. Одан кейін сөз алған ақынның жерлестері мен позия сүйер қаумым да А.Балтабайұлының өлең-жырлары оқырмандар өздері үшін жағымды жаңалық ашқандай әсер алғанын сөз етті.
Профессор С.Негімов ақын өлеңдері рубаи мен афоризмдерге толы екенін, олардың мән-мағынасы бүгінгі өмірмен тығыз қабысып жататыны, ақын шығармашылығының ерекшелігіне жатқазды. Ақындар арасында «Ақындық арнайы құжатпен бекітіліп бере салатын мамандық емес» деген қағида бар,- деді профессор С.Негімов. Ақын деген сөздің өзі ерекше ұғым. Халық ақындарын, жазушыларын оның атағымен, байлығымен бағаламайды, оның өнер жолындағы еңбегімен бағалайды. Сондай ақынның бірі бүгінгі біздің қонағымыз, Оңтүстік өңіріне кеңінен танымал азамат-ақын Айыпберген Балтабайұлы. Айыпберген айтқандай, көзбен көргенді, көкірегіңмен сезе білгенде ғана жыр туындайды. Осындай талғамның арқасында соңғы жылдары ақынның «Уа, Дариға-ай», «Алтын бесік», «Ғашықтар әні», «Жүрек жылуы», «Назеркем» кітаптары жарық көрді. Соңғы кезде дүниеге келген «Туған жер» рубаят, өлең-жырлары сөзсіз оқырмандарды бей-жай қалдырмайды. Бұл кітапты қолға алғандар ақынның туған жерге, оның адамдарына деген махабатын сезінетіні хақ.
Кешке қатысушы оқырмандар ақынның бірнеше өлеңдерін оқыды. Сонымен бірге ақын сөзіне жазылған бірнеше өлеңдер орындалып, ол көпшілік көңілінен шықты.
