ҚР Мәдениет министрлігі Мәдениет комитетінің 2010 жылғы 14 шілдедегі №90-К бұйрығымен Қазақстан Республикасы Ұлттық академиялық кітапханасының бас директоры лауазымына Шаймұханбетова Жанна Кәкібайқызы тағайындалды. Сәрсенбі күні ҚР Мәдениет министрлігі Мәдениет комитетінің төрағасы І. Қозыбаев жаңа басшыны ұжымға таныстырды.
Ж. Шаймұханбетова бұған дейін Н. В. Гоголь атындағы Қарағанды облыстық әмбебап ғылыми кітапханасын 14 жыл бойы басқарған. Жалпы еңбек өтілі – 30 жыл.
Мәскеу мемлекеттік Мәдениет институтының түлегі (1986 ж.). Халықаралық деңгейде ұйымдастырылған іс-шаралардың белсенді қатысушысы: ИФЛА Бас конференциясы (Пекин-1996, Берлин-2003, Сеул-2006, Милан-2009), «Қырым-2006», «Ыстықкөл-2007» халықаралық конференциялары, АҚШ Мемдепартаменті бағдарламасының түлегі.
Бірнеше мәрте мемлекеттік марапаттар мен құрметті атақтарға ие болған: «Ерен еңбегі үшін» медалі, ҚР Мәдениет және ақпарат министрлігінің «Мәдениет қайраткері» төсбелгісі, ҚР Мәдениет және ақпарат министрлігі мен Қарағанды облыстық Мәдениет департаментінің Құрмет Грамоталары, ҚР Ұлттық кітапханасының «Үздік кітапханашы» құрмет белгісі.
Халықаралық ақпараттандыру академиясының корреспондент мүшесі.
