19 шілдеде ҚР Ұлттық академиялық кітапханасында Леоу Нин (ҚХР) университетінің профессоры Су Шу Янның қазақ тілінде жарық көрген «Қытайтану» кітабының тұсаукесері өтті. Кітапты қытай тілінен қазақшаға тәржімалағандар – Дулат Мәлікұлы, Бек Дөкейұлы, Серік Кененбай. Кітап 2010 жылы Астанадағы «Хұснихат» баспасынан басылып шықты.
Тұсаукесерге ҚХР-нан арнайы шақырылған қонақтар – ҚХР Ақпарат министрлігінің жанындағы Баспа және басылымдар ісі жөніндегі бас басқарманың бастығы Юан Юэлун, Ұлттық мәселелер жөніндегі Мемлекеттік комитеттің мәдениет және байланыс басқармасының бастығы Чен Шан Уан, ҚХР «Ұлттар» баспасы Бас редакторының орынбасары Архинкадир, қазақ тілді басылымдар бойынша редакциялық басқарма директоры Әлімжан Нұрғазыұлы, оның орынбасары Бақытбек Тоқтасын, «Ұлттар» баспасы ұйғыр бөлімінің бастығы Якуп.
Тұсаукесерде ҚР Ұлттық академиялық кітапханасының бас директоры Ж. К. Шаймұханбетова, Қазақстан Республикасындағы Қытай Халық Республикасының Төтенше және Өкілетті Елшісі Чжоу Ли мырза, Қытайдан келген қонақтар мен қазақстандық жазушылар сөз сөйледі.
Бұл кітапқа бес мың жылдан астам тарихы бар Қытай елінің өсіп-өркендеу жолдары, сан мың соқпақты асулары және де бүгінгі жетістіктеріне жетекші күш болған ежелгі Қытай мәдениетінің тарихы негіз болады.
Сондықтан кітап стилі де ерекше, кейбір сөздер мен сөйлемдер алғашқы нұсқасында сақталған. Бірқатар бөлімдерге өзгертулер мен қысқартулар жасалса, келесі бір бөліміндегі сөздер мен сөйлемдердің аудармасы өзгеріссіз қалған. Мұның бәрі оқиғаның мазмұны оқырманға түсінікті болу үшін жасалып отыр.
Кітап көпшілік оқырман қауымға арналады.
