Үстіміздегі жылдың 1-ші қыркүйегінде ҚР Ұлттық академиялық кітапхананың этнография залында әйгілі халық композиторы Үкілі Ыбырайдың (1860 -1930 жж.) туғанына 150 жыл толуына арналған «Қайран Гәкку» атты әдеби-музыкалы кеші өтті.
Үкілі Ыбырай Сандыбайұлы (шын аты -Ыбырай) (1860, Көкшетау облысы, Володар ауданы - 1930)- қазақтың халық сазгері, белгілі әнші әрі ақын-импровизатор, классикалық халық музыкасының ірі өкілдерінің бірі. Үкілі Ыбырай бала кезінде молдадан оқып, арабша сауатты болған. Жасынан әнге, өлеңге құмар Үкілі Ыбырай қазақтың атақты әнші-ақындарынан (Орынбай, Арыстанбай, Шөже, Біржан,Ақан, Балуан Шолақ, Тезекбай) үлгі-өнеге алып, олардың творчестволық дәстүрін бойына сіңірді. Өз заманында әнші-сазгерлігімен аты шыққан Үкілі Ыбырайдың музыкалық мұрасында 40-қа жуық әндер бар. Мысалы, «Гәкку» (4 түрі), «Қарақат көз», «Арарай», «Кідік-ай», «Бір қызық ит жүгіріп, аң ауласа», «Дүние», «Шалқыма», «Көкше», «Сүйгенім кете барды қасыма еріп», «Қалқа бел», «Желдірме» т.б. Кешке қатысушы қонақтар мен оған қатысушылар, кешті жүргізуші этнограф маман Сымбат Мұхамедияровамен бірге «Гәкку» әнін үлкен тебіреніспен орындады.
Үкілі Ыбырайдың сазгерлік мұрасы мен ақындық өнері жайлы Қазақстан жазушылар Одағының мүшесі, белгілі қоғам қайраткері Кәкімбек Салықов, белгілі ақын Серік Тұрғынбеков, Мәжіліс депутаты Ж.Қ.Сүлейменов, ҚР Парламенті Сенатының редакциялық баспа бөлімінің консультанты К.Д.Қожақметов, белгілі журналист ҚР ҰАК консультанты М.Ж.Байғазиндер өз пікірлерін ортаға салса, Астана қаласы жастар Мәслихатының мүшесі Әсел Жарылғапова С.Мәуленовтың «Үкілі Ыбырай» өлеңін оқып берді. Осы шараға байланысты этнография залының мамандары Үкілі Ыбырайдың өмірі мен шығармашылығына арналған «Қайран, Гакку» экспозициясын әзірледі.
